Biyernes, Oktubre 21, 2011

Desiderata in Cebuano




Taga Cebu
Just want to share this one to our friends in this page. Hope you like it.









 
Mga Kalab-uton (Desiderata)
Hinubad ni Chris D. Malazarte

Panaw's kahamugaway taliwa sa ka-alingisig og pag-apura
Og hinumdumi ang kalinaw diha sa kahilum.

Kutob sa mahimo og sa wala'y pagtalaw,
Magmabinati-on ka sa tanan.
Ibutyag sa tumang pagmatngon og katataw ang imong kamatu-oran;
Og manalinghog ka sa uban,
Bisan sa ilang pagka wa'y kabanka-agan og kawang sa kaalam
gani, naay mga kada-iyang sugid.
Likayi ang mga banha-an og mahuwabon;
kay makadagmal sila sa galamhan.

Kung itandi nimo ang kaugalingon sa uban,
Mahimo'ng mapasigarbohon ka o kaha masakitan ka lang,
kay sa kanunay adunay mas labaw og mas uyamot pa kanimo.

Ikalipay ang kalampusan ingon man ang imong mga laraw.
Pabili'ng magkanunayon sa imong mga tinguha hinunoa'ng mapahiubsanon;
kini'mao'y labawng bahandi sa nagkalain-laing haguros sa panahon.

Mag-amping sa imong mga kalihoka'ng patigayon,
kay ang kalibutan puno sa lingla.
Sanglit dili ka magpakabuta sa mga maayong mithi;
dagha'ng nanglimbasog sa taas nga tingusbawan,
Og bisa'g asa, ang kinabuhi puno sa pagkamabayanihon.
Magmatinud-anon sa kaugalingon.
Hilabi na ayaw pagpakaarun-ingnon sa pagpangga,
Lakip ang pagkatahap sa gugma;
atubangan sa iyang pagkamala og kapu-ol,
maluntaron pa kini sa mga kasagbutan.

Kalawata ang mga pagtulun-an sa katuigan,
og itugyan na lamang sa panumduman ang mga butang iya sa kabatan-on.
Ugmara ang kalig-on sa kalag isip taming sa kalit nga kalautan.
Ayaw budlaya ang kaugalingon sa mga mangi-ub nga paghanduraw.
Dagha'ng kahadlok ang nahimugso sa kalapoy ug pag-inusara.

Gawas sa bug-os nga pagpantol,
Magma-aghopon sa imong kaugalingon.
Ikaw nilalang sa kalibutan.
Labaw pa sa mga kakahoyan og kabitoonan;
katungod nimo ang mahimugso.
Ug tataw o dili man gani kanimo,
Wala'y limod ang pagpadayong paghikyad sa kalibutan sama sa naandan.

Busa, magmalinawon diha sa Ginoo
og unsa man gani ang imong paghulagway Kaniya.
og unsa man kining mga pagpanglimbasog og mga pangandoy,
sulod sa alingog-ngog nga kalibog sa kinabuhi,
Bat'ni ang kalinaw sa kalag.

Uban sa iyang mga limbong og kabulos,
ug mga nahugno'ng damgo,
Matahum pa gihapon ang kalibutan.
Pagmaya. Tinguhaa ang magmalipayon.

Walang komento:

Mag-post ng isang Komento